डोटी, माघ ०८ — पद्म पब्लिक मुक्ति नारायण माध्यमिक विद्यालयको ७८औँ वार्षिकोत्सवको उपलक्ष्यमा आयोजित अन्तरविद्यालय स्तरीय विज्ञान प्रदर्शनी प्रतियोगिता सम्पन्न भएको छ।
विद्यार्थीहरूमा वैज्ञानिक सोच, सिर्जनशीलता तथा अनुसन्धानप्रतिको रुचि अभिवृद्धि गर्ने उद्देश्यले आयोजना गरिएको प्रतियोगितामा जिल्लाका विभिन्न विद्यालयहरूको उत्साहजनक सहभागिता रहेको थियो। प्रतियोगितामा विद्यार्थीहरूले विज्ञान र प्रविधिमा आधारित विभिन्न नवप्रवर्तनशील परियोजना, नमूना तथा प्रयोगात्मक सामग्रीहरू प्रस्तुत गरेका थिए।
प्रतियोगिताको नतिजाअनुसार केदारेश्वर माध्यमिक विद्यालय प्रथम स्थान हासिल गर्न सफल भएको छ भने भागरती एकेडेमीले द्वितीय स्थान प्राप्त गरेको छ। त्यसैगरी आयोजक विद्यालय पद्म पब्लिक मुक्ति नारायण माध्यमिक विद्यालय र दिल्पेश्वर माध्यमिक विद्यालय संयुक्त रूपमा तृतीय स्थानमा रहेका छन्। दुर्गा माध्यमिक विद्यालयले सान्त्वना स्थान प्राप्त गरेको छ।
कार्यक्रममा विद्यालय व्यवस्थापन समितिका पदाधिकारी, शिक्षक–शिक्षिका, अभिभावक, स्थानीय बुद्धिजीवी तथा विद्यार्थीहरूको उल्लेखनीय उपस्थिति रहेको थियो। सहभागी विद्यालयका विद्यार्थीहरूको प्रस्तुतीको मूल्याङ्कन विषयवस्तुको वैज्ञानिक आधार, प्रयोगात्मक क्षमता, नविनता तथा प्रस्तुतीकरणको शैलीका आधारमा गरिएको आयोजकले जनाएको छ।
विद्यालयका प्रधानाध्यापक केशव राज ओझाले विज्ञान शिक्षा व्यवहारिक र जीवनोपयोगी बनाउन यस्ता प्रतियोगिताहरू प्रभावकारी हुने बताउँदै आगामी दिनमा समेत यस्ता शैक्षिक गतिविधिहरूलाई निरन्तरता दिइने प्रतिवद्धता व्यक्त गर्नुभयो। कार्यक्रममा विजयी विद्यार्थीहरूलाई प्रमाणपत्र तथा पुरस्कार वितरण गरिएको थियो।