तिर्थ नेपाली
काठमाण्डौ
बालाजु स्कुल अफ ईन्जिनियरिङ एण्ड टेक्नोलोजीको ६४औँ वार्षिकोत्सव विविध कार्यक्रमका साथ भव्य रूपमा सम्पन्न भएको छ । बुधबार आयोजित विशेष समारोह शिक्षालय प्रमुख सुशील कुमार श्रेष्ठको अध्यक्षतामा सम्पन्न भएको हो।
समारोहमा शिक्षालयका उपप्रमुख रघुवर लाल जोशी तथा प्रदीप न्यौपाने विशिष्ट अतिथिका रूपमा रहनु भएको थियो । कार्यक्रममा बोल्दै प्रमुख श्रेष्ठले विज्ञान र प्रविधिले तीव्र गति लिइरहेको वर्तमान युगमा प्राविधिक शिक्षाको आवश्यकता अझै बढ्दै गएको उल्लेख गर्नुभयो। “राष्ट्रको दिगो विकास र आत्मनिर्भर अर्थतन्त्र निर्माणका लागि सीपयुक्त, दक्ष र प्रतिस्पर्धी जनशक्ति उत्पादन अपरिहार्य छ,” उहाँले भन्नुभयो।
वि.सं. २०१८ सालमा ‘मेकानिकल ट्रेनिङ सेन्टर’का रूपमा स्थापना भएको यस शिक्षालयले समयानुकूल आफ्नो शैक्षिक दायरा विस्तार गर्दै हाल ६ वटा डिप्लोमा तहका कार्यक्रम सञ्चालन गरिरहेको छ। विगत ६४ वर्षमा हजारौँ विद्यार्थी उत्पादन गरी स्वदेश तथा विदेशका विभिन्न उद्योग, निर्माण, ऊर्जा, अटोमोबाइल तथा प्राविधिक क्षेत्रमा योगदान पुर्याउँदै आएका छन्।
कार्यक्रममा प्राविधिक शिक्षालाई राज्यले प्राथमिकतामा राख्नुपर्ने आवश्यकता औँल्याइयो। प्रशिक्षकहरूको मनोबल उच्च राख्न, तालिम तथा प्रविधि अद्यावधिक गर्न, तथा उद्योगसँग सहकार्य बढाउन सम्बन्धित निकाय गम्भीर बन्नुपर्ने धारणा वक्ताहरूले राख्नुभयो।
वार्षिकोत्सवका अवसरमा उत्कृष्ट विद्यार्थी, कर्मचारी तथा प्रशिक्षकहरूलाई सम्मान गरिएको थियो भने विद्यार्थीहरूले सांस्कृतिक कार्यक्रम, नवप्रवर्तन प्रदर्शनी तथा प्राविधिक परियोजनाहरू प्रस्तुत गरेका थिए। कार्यक्रममा अभिभावक, पूर्वविद्यार्थी, उद्योग क्षेत्रका प्रतिनिधि तथा सरोकारवाला निकायहरूको समेत उल्लेखनीय सहभागिता रहेको थियो।
६४ वर्षको गौरवशाली इतिहास बोकेको यस शिक्षालयले आगामी दिनमा गुणस्तरीय, व्यवहारिक तथा रोजगारमुखी शिक्षा प्रदान गर्दै देशलाई आवश्यक प्राविधिक जनशक्ति उत्पादनमा अझ प्रभावकारी भूमिका निर्वाह गर्ने प्रतिबद्धता व्यक्त गरेको छ।
