डोटी — शिला स्थान युवा क्लबको आयोजनामा सञ्चालन हुन लागेको “डोटी गोल्डकप २०८२” प्रतियोगिता स्थगित गरिएको छ। यसअघि यही चैत्र ५ गतेदेखि सुरु हुने भनिएको प्रतियोगिता अर्को सूचना नआएसम्मका लागि रोकिएको क्लबले जनाएको छ।
क्लबका अध्यक्ष हिक्मत मलासीका अनुसार नजिकिँदै गरेको माध्यमिक शिक्षा परीक्षा (एसईई) तथा आधारभूत तह (बीएलई) लाई मध्यनजर गर्दै प्रतियोगिताको मिति सारिएको हो। परीक्षाका कारण विद्यार्थी, खेलाडी तथा अभिभावकहरूलाई असहज नहोस् भन्ने उद्देश्यले यस्तो निर्णय गरिएको अध्यक्ष मलासीले जानकारी दिनुभयो।
उहाँका अनुसार प्रतियोगिता पूर्ण रूपमा रद्द नभई केवल स्थगित गरिएको हो र चैत्र महिनाभित्रै नयाँ मिति निर्धारण गरी प्रतियोगिता सञ्चालन गरिनेछ।
डोटी गोल्डकप जिल्लाकै प्रतिष्ठित फुटबल प्रतियोगितामध्ये एक मानिन्छ, जसमा स्थानीय तथा बाहिरी टिमहरूको सहभागिता रहने गर्दछ। प्रतियोगिता स्थगित भएपछि खेलप्रेमीहरूमा केही निराशा देखिए पनि परीक्षा प्राथमिकतामा राख्दै गरिएको निर्णयलाई सकारात्मक रूपमा लिइएको छ।
