डोटी जिल्लामा व्यवसायिक तरकारी उत्पादन प्रवर्द्धन गर्ने उद्देश्यले तीन दिने तालिम सिलगढीमा सुरु गरिएको छ।
राष्ट्रिय कृषि आधुनिकीकरण कार्यक्रम डडेल्धुराको आयोजनामा सुरु भएको तालिममा जिल्लाका पाँच वटा पालिकाबाट २० जना किसानहरुको सहभागिता रहेको छ।
किसानहरुलाई मौसमी तथा बेमौसमी तरकारी उत्पादनसम्बन्धी ज्ञान प्रदान गर्ने उद्देश्यले तालिम सञ्चालन गरिएको कार्यक्रमका प्रमुख पिताम्बर बस्नेत ले जानकारी दिनुभयो। उहाँका अनुसार जिल्लामा व्यवसायिक कृषक उत्पादन गर्ने लक्ष्यका साथ कार्यक्रम अघि बढाइएको हो।
बस्नेतले बजारको आवश्यकता र खपतको आधारमा तरकारी खेती गर्न किसानहरुलाई आग्रह गर्दै उत्पादनलाई बजारसँग जोड्नुपर्नेमा जोड दिनुभयो।
यसैगरी, जिल्ला समन्वय समितिका प्रमुख लक्ष्मण बहादुर सिंह ले सरकारले उपलब्ध गराउने सेवा सुविधा वास्तविक किसानहरुले मात्र पाउने बताउनुभयो। अनुदानका लागि मात्र अस्थायी रुपमा किसान बन्ने प्रवृत्तिमाथि निगरानी गरिने उहाँको भनाइ छ।
चैत्र १० गतेदेखि सुरु भएको तालिम चैत्र १२ गतेसम्म सञ्चालन हुने आयोजकले जनाएको छ।