डोटी ,जेठ २१
सुबास नेपाली
जातीय भेदभाव तथा छुवाछूत उन्मूलन राष्ट्रिय दिवसको अवसरमा पद्म पब्लिक मुक्तिनारायण माध्यमिक विद्यालयमा विद्यार्थी लक्षित सचेतनामूलक कार्यक्रम सम्पन्न गरिएको छ।
“दलित समुदायको न्यायमा पहुँचका लागि राज्य संरचनाको प्रभावकारी परिचालन” भन्ने नारासहित आयोजित कार्यक्रममा विद्यालयका विद्यार्थी तथा विभिन्न सरोकारवाला निकायका प्रतिनिधिहरूको सहभागिता रहेको थियो।
दलित महिला संघ (फेडो) डोटीको आयोजनामा तथा जिल्ला प्रहरी कार्यालय डोटीको समन्वयमा सम्पन्न कार्यक्रममा जातीय भेदभाव तथा छुवाछूत विरुद्धका कानुनी व्यवस्था, सामाजिक प्रभाव तथा यसको अन्त्यका लागि युवापुस्ताले खेल्नुपर्ने भूमिकाबारे छलफल गरिएको थियो।
कार्यक्रममा दलित महिला संघ डोटीका जिल्ला परियोजना संयोजक शंकर विश्वकर्माले नेपालमा छुवाछूत अन्त्यका लागि भएका कानुनी तथा नीतिगत व्यवस्थाबारे प्रस्तुति दिनुभएको थियो। उहाँले जातीय विभेद तथा छुवाछूत कानुनतः दण्डनीय अपराध भएको भन्दै यसको अन्त्यका लागि सबै पक्ष सचेत हुनुपर्नेमा जोड दिनुभयो।
कार्यक्रमका प्रमुख अतिथि तथा दिपायल सिलगढी नगरपालिका वडा नं. ७ का वडा अध्यक्ष कर्णबहादुर बिष्टले समानता, सामाजिक न्याय र मानवअधिकारको संरक्षण सबैको साझा दायित्व भएको बताउनुभयो। उहाँले विभेदरहित समाज निर्माणका लागि सबै समुदायबीच आपसी सम्मान र सहकार्य आवश्यक रहेको धारणा व्यक्त गर्नुभयो।
दलित महिला संघ (फेडो) डोटीकी अध्यक्ष सरिता दयालीले समाजबाट जातीय भेदभाव र छुवाछूत जस्ता कुप्रथाको अन्त्य गर्न विद्यालय तहदेखि नै सचेतना फैलाउन आवश्यक रहेको बताउनुभयो। उहाँले युवा पुस्ता परिवर्तनका संवाहक भएकाले उनीहरूलाई लक्षित गरी यस्ता कार्यक्रम सञ्चालन गरिएको उल्लेख गर्नुभयो।
त्यस्तै जिल्ला प्रहरी कार्यालयका सई रामनाथले कानुनले निषेध गरेको जातीय विभेद र छुवाछूतलाई समाजका सबै तह र तप्काले मिलेर उन्मूलन गर्नुपर्ने बताउनुभयो।
कार्यक्रममा अतिथिका रूपमा जिल्ला प्रहरी कार्यालय डोटीका सई रामनाथ, योगेश गुरुङ तथा बबीकुमार बिसि सहभागिता रहेको थियो। सो
कार्यक्रममा सहभागी विद्यार्थीहरूले विभेदरहित समाज निर्माणका लागि आफूहरू सक्रिय भूमिका निर्वाह गर्ने प्रतिबद्धता व्यक्त गरेका थिए। कार्यक्रमको अध्यक्षता दलित महिला संघ (फेडो) डोटीकी अध्यक्ष सरिता दयालीले गर्नुभएको थियो।
