डोटी, जेठ २२
सुबास नेपाली
“समृद्ध भविष्यको आधार : जलवायु एवं प्रकृतिमैत्री विकास” भन्ने मूल नाराका साथ डोटीमा विश्व वातावरण दिवस २०८३ विभिन्न कार्यक्रम गरी मनाइएको छ। दिवसको अवसरमा दिपायल सिलगढी नगरपालिका–७ पैयुँभज्याङस्थित श्री भैरव प्रसाद गणको परिसरमा वृक्षारोपण कार्यक्रम सम्पन्न गरिएको हो।
डिभिजन वन कार्यालय डोटीको आयोजना तथा सरोकारवाला निकायहरूको सहभागितामा आयोजित कार्यक्रममा विभिन्न प्रजातिका बिरुवा रोपिएका थिए।
कार्यक्रमलाई सम्बोधन गर्दै जिल्ला समन्वय प्रमुख सिंहले वन तथा जंगल मानव जीवनका लागि अपरिहार्य सम्पदा भएको उल्लेख गर्दै यसको संरक्षणका लागि सबै नागरिकले आ–आफ्नो क्षेत्रबाट जिम्मेवारीपूर्वक भूमिका निर्वाह गर्नुपर्ने बताउनुभयो। उहाँले वातावरणीय सन्तुलन कायम राख्न र भावी पुस्ताका लागि हरियाली जोगाइराख्न वृक्षारोपण तथा वन संरक्षण अभियानलाई निरन्तरता दिनुपर्नेमा जोड दिनुभयो।
त्यसैगरी डिभिजन वन कार्यालय डोटीका प्रमुख गोकुल रिजालले वातावरण संरक्षण र हरित विकासमा टेवा पुर्याउने उद्देश्यले सामूहिक रूपमा विभिन्न प्रजातिका बिरुवा रोपिएको जानकारी दिनुभयो। वृक्षारोपणले जैविक विविधता संरक्षण, भू–क्षय नियन्त्रण तथा स्वच्छ वातावरण निर्माणमा महत्वपूर्ण योगदान पुर्याउने उहाँको भनाइ थियो।
प्रमुख जिल्ला अधिकारी कल्पना घिमिरे नेपालले पछिल्ला वर्षहरूमा जलवायु परिवर्तनका असरहरू बढ्दै गएको उल्लेख गर्दै त्यसको न्यूनीकरणका लागि वृक्षारोपण प्रभावकारी उपाय भएको बताउनुभयो। उहाँले प्राकृतिक स्रोतको संरक्षण, वन क्षेत्रको विस्तार तथा वातावरणमैत्री विकासलाई प्राथमिकता दिनुपर्ने आवश्यकता औँल्याउनुभयो।
कार्यक्रममा जिल्ला समन्वय समिति डोटीका प्रमुख लक्ष्मण बहादुर सिंह, प्रमुख जिल्ला अधिकारी कल्पना घिमिरे नेपाल, श्री भैरव प्रसाद गणका गणपति प्रमुख सेनानी कमल सिंह बिष्ट, जिल्ला प्रहरी कार्यालय डोटीका प्रमुख प्रहरी उपरीक्षक सागर बोहरा, सशस्त्र प्रहरी बल नम्बर ३६ गणका प्रमुख सशस्त्र प्रहरी उपरीक्षक शिवप्रसाद गैरे, डिभिजन वन कार्यालयका प्रमुख गोकुल रिजाल, जिल्ला अनुसन्धान कार्यालयका प्रमुख अनुसन्धान अधिकृत ललित नारायण चौधरी, भू तथा जलाधार व्यवस्थापन कार्यालयका प्रमुख श्याम श्रेष्ठ, डिभिजन वन कार्यालयका कर्मचारी, भैरव प्रसाद गणका अधिकृत तथा सुरक्षाकर्मीहरूको सहभागिता रहेको थियो।
