डोटी, जेठ २२
सुबास नेपाली
डोटीस्थित नेपाली सेनाको श्री भैरव प्रसाद गण सम्मानित भएको छ। दिपायल सिलगढी नगरपालिकाको आयोजनामा सुरु भएको दोस्रो मेयर कप प्रतियोगिताको उद्घाटन समारोहका अवसरमा गणका गणपति प्रमुख सेनानी कमल सिंह बिष्टलाई सम्मान गरिएको हो।
जिल्ला समन्वय समितिका प्रमुख लक्ष्मण बहादुर सिंह तथा दिपायल सिलगढी नगरपालिकाका नगर प्रमुख बाजी सिंह खडकाले कदरपत्र तथा दोसल्ला ओढाएर प्रमुख सेनानी बिष्टलाई सम्मान गर्नुभएको थियो।
दिपायल सिलगढी नगरपालिकाका अनुसार गणले जिल्लाको धार्मिक, सामाजिक, ऐतिहासिक, खेलकुद तथा पर्यटन प्रवर्द्धन लगायतका क्षेत्रमा पुर्याएको उल्लेखनीय योगदानको कदरस्वरूप उक्त सम्मान प्रदान गरिएको हो।
उद्घाटन समारोहमा खेलकुदका क्षेत्रमा योगदान पुर्याउने अन्य व्यक्तित्वहरूलाई पनि सम्मान गरिएको थियो। वडा अध्यक्ष नरेश मलासी, राष्ट्रिय भलिबल खेलाडी जनक खडका तथा कृष्ण भण्डारीलाई खेलकुद क्षेत्रमा पुर्याएको योगदानको उच्च मूल्याङ्कन गर्दै सम्मान गरिएको आयोजकले जनाएको छ।
दोस्रो मेयर कप प्रतियोगिताको उद्घाटनसँगै आयोजित सम्मान कार्यक्रममा जनप्रतिनिधि, सुरक्षाकर्मी, खेलाडी तथा स्थानीय नागरिकहरूको उल्लेखनीय सहभागिता रहेको थियो।
