डोटी ,श्रावण २५
शंकर विश्वकर्मा
दलित महिलाहरूको आर्थिक आत्मनिर्भरता र उद्यमशीलता प्रवर्द्धन गर्ने उद्देश्यले डोटीमा ३ दिने व्यवसाय विकास तथा वित्तीय साक्षरता सम्बन्धी तालिम सम्पन्न भएको छ।
दलित महिला संघ फेडोको आयोजना र के.आई.सिंह गाउँपालिकाको सहकार्यमा साउन २१ देखि २३ गतेसम्म सञ्चालन भएको हो ।
२५ जना दलित महिलाहरूको सहभागिता रहेको तालिममा व्यवसाय योजना निर्माण, व्यवस्थापन, प्रतिस्पर्धी बजारमा प्रवर्धन र बिक्रीका रणनीतिहरू, उच्च मूल्यका उत्पादनमा आधारित उद्यम विकास, र सरकारी तथा निजी क्षेत्रका नीतिगत जानकारी समेत दिने उदेश्यले तालिम संचालन गरिएको दलित महिला संघ फेडो डोटी जिल्ला संयोजक शंकर वि.क ले बताए |
कार्यक्रमका प्रमुख अतिथि गाउँपालिका उपाध्यक्ष मिना बिष्टले महिलाहरूको आर्थिक सशक्तिकरणका लागि सीपमूलक तालिमहरू अपरिहार्य रहेको बताउँदै आगामी दिनमा पालिकाको तर्फबाट निरन्तर सहयोग गर्ने प्रतिवद्धता ब्यक्त गरिन।
वडा नं. ४ का अध्यक्ष जयलाल धामीले महिलाहरूको उद्यमशीलता स्थानीय आर्थिक विकासको आधार हुनेमा विश्वास व्यक्त गर्दै महिलाहरुलाई साना साना व्यवसायमा लाग्न अनुरोध गर्नुका साथै स्थानीय उत्पादनमा जोड दिन आग्रह गरे |
तालिमको सहजीकरण यज्ञ बहादुर रावलले गरेका थिए |
सहभागी महिलाहरूले सिकेका सीपलाई व्यवहारमा उतार्ने प्रतिबद्धता व्यक्त गर्दै तालिमले आफ्नो व्यवसायिक सोच र आत्मविश्वासमा वृद्धि गरेको अनुभव सुनाएका थिए।
