डोटी ,भाद्र १४
डिजिटल प्रविधिको बढ्दो प्रयोगसँगै यसको अवसर र जोखिमबारे सचेतना आवश्यक रहेको भन्दै दलित महिला संघ फेडोको आयोजना तथा जिल्ला प्रहरी कार्यालय डोटीको समन्वयमा डोटीको पिपल्लामा २ दिने “डिजिटल साक्षरता तथा साइबर अपराध सम्बन्धि अभिमुखिकरण कार्यक्रम” सम्पन्न भएको छ।
कार्यक्रममा सहभागीहरूलाई अनलाइन सुरक्षा, सामाजिक सञ्जालको जिम्मेवार उपयोग, पासवर्ड सुरक्षा, साइबर ठगी तथा हैकरबाट जोगिने उपाय लगायतका विषयमा जानकारी दिइएको थियो।
समापन कार्यक्रममा बोल्दै कार्यक्रमका प्रमुख अतिथि तथा दिपायल सिलगढि नगरपालिकाका नगर प्रमुख बाजि सिंह खडकाले नेपालमा तीव्र गतिमा बढिरहेको साइबर अपराधका नयाँ प्रवृत्ति र यसलाई रोकथाम गर्न आवश्यक डिजिटल साक्षरता, सचेतना र कानुनी प्रावधानबारे प्रष्ट पार्नुभयो।
सामाजिक संजालको सहि सदुपयोग गर्न सके फाईदा र दुरुपयोग भए धेरै क्षेति व्यहोर्नुपर्ने पनि बताउनुभयो ।
डिजिटल प्रविधिको प्रयोगलाई सुरक्षित, जिम्मेवार र उत्पादनशील बनाउन यस्ता अभिमुखिकरण कार्यक्रमले सहयोग पुग्ने पनि नगर प्रमुख खडकाले बताउनुभयो।
कार्यक्रममा बोल्दै जिल्ला प्रहरी कार्यालय डोटीका प्रहरी निरीक्षक नवराज रावलले साइबर अपराधका नयाँ प्रवृत्तिहरु आईरहेको हुदा सामाजिक संजाल प्रयोग गर्दा धेरै कुरामा ख्याल गर्नुपर्ने बताउनुभयो ।
कार्यक्रममा बोल्दै दलित महिला संघ फेडो डोटीकि कार्यसमिति सदस्य तथा समापन कार्यक्रमकि सभापति मन्जु नेपालीले अभिमुखिकरणले सामाजिक संजालको प्रयोग गर्दा धेरै कुराको ख्याल गर्नु पर्ने बताउदै कार्यक्रमको उदेश्य सामाजिक संजालबाट हुने ठगी र साईबर अपराध सम्बन्धी सचेतना फैलाउने रहेको पनि बताउनुभयो ।
कार्यक्रममा दलित महिला संघ फेडोका के आई सिंह गाउपालिका र दिपायल सिलगढि नगरपालिकाकामा गठित समुह ,संजाल र वडा सदस्यको उपस्थिति रहेको थियो।
