डोटी, माघ ०८
दिपायल सिलगढी नगरपालिका वडा नं. ६ को कार्यालयले विद्यार्थीहरूलाई जाडो मौसमबाट जोगाउने उद्देश्यले न्यानो स्विटर वितरण गरेको छ।
वडाको वार्षिक स्वीकृत कार्यक्रम अन्तर्गत डोटीस्थित पद्म पब्लिक मुक्तिनारायण माध्यमिक विद्यालयमा अध्ययनरत शिशु कक्षा देखि कक्षा ११ सम्मका जम्मा १ हजार ९४ जना छात्र–छात्रालाई करिब ५ लाख रुपैयाँ बराबरका स्विटर वितरण गरिएको वडा अध्यक्ष नरेश मलासीले जानकारी दिनुभयो।
जाडो मौसममा विद्यार्थीहरूलाई चिसोबाट बचाई नियमित रूपमा विद्यालय उपस्थित हुन प्रेरित गर्ने तथा अध्ययनमा सहजता प्रदान गर्ने उद्देश्यले स्विटर वितरण गरिएको अध्यक्ष मलासीले बताउनुभयो । विद्यार्थीहरू न्यानो कपडाको अभावमा बिरामी नपरुन, विद्यालय नछोडून् भन्ने उदेश्य पनि रहेको उहाले बताउनुभयो ।
विद्यालयका प्रधानाध्यापक केशव राज ओझाले स्विटर वितरण कार्यक्रमले विद्यार्थीहरूलाई जाडो मौसममा ठूलो राहत पुग्ने बताउँदै वडा कार्यालयको यस कार्यको प्रशंसा गर्नुभयो। यसले विद्यार्थीहरूको स्वास्थ्य र उपस्थितिमा सकारात्मक प्रभाव पार्ने पनि उहाले बताउनुभयो ।
दिपायल सिलगढी नगरपालिका वडा नं ६ ले हरेक वर्ष आफ्ना वडाभित्र रहेका विद्यालयहरूमा पालैपालो विद्यालय पोशाक, शैक्षिक सामग्री वितरण तथा अन्य सहयोग कार्यक्रमहरू सञ्चालन गर्दै आएको छ।
