डोटी, माघ २७
सुबास नेपाली
डोटीमा वन्यजन्तु संरक्षण, अपराध नियन्त्रण तथा मानव–वन्यजन्तु द्वन्द्व व्यवस्थापनलाई थप प्रभावकारी बनाउने उद्देश्यले जिल्ला स्तरिय वन्यजन्तु अपराध नियन्त्रण एकाईको बैठक सम्पन्न भएको छ।
वन्यजन्तु नियन्त्रण आदेश २०८० मा बनेको व्यवस्थाअनुसार डिभिजन वन कार्यालय डोटीका वरिष्ठ डिभिजनल अधिकृत गोकुल रिजालको अध्यक्षता तथा प्रमुख जिल्ला अधिकारी कल्पना घिमिरे नेपालको उपस्थितिमा विभिन्न सरोकारवाला निकायका पदाधिकारीहरुको सहभागितामा बैठक सम्पन्न भएको हो।
बैठकमा हाल जिल्लामा भइरहेको वन्यजन्तु अपराध, वन पैदावारको चोरी–निकासी नियन्त्रण, मानव–वन्यजन्तु द्वन्द्वको अवस्था तथा संरक्षण व्यवस्थापनका प्रयास र प्रगतिबारे विस्तृत प्रस्तुति, समीक्षा र छलफल गरिएको थियो।
बैठकले मानव–वन्यजन्तु द्वन्द्व न्यूनीकरणका लागि स्थानीय तहहरूले आगामी आर्थिक वर्षको योजना तर्जुमा गर्दा न्यूनिकरण शीर्षकमा आवश्यक बजेट विनियोजन गर्न आग्रह गर्ने,डोटी जिल्लामा एक वन्यजन्तु उद्धार केन्द्र स्थापना गर्न प्रदेश वन मन्त्रालय, निर्देशनालय तथा सहयोगी सरकारी/गैरसरकारी संस्थाहरूसँग अनुरोध गर्ने,घाइते तथा उद्दार आवश्यक वन्यजन्तुको उद्दारका लागि एक र्यापिड रेस्पोन्स टिम गठन गर्ने तथा उक्त टोलीलाई आवश्यक तालिम र सामग्री उपलब्ध गराउन सम्बन्धित निकायसँग अनुरोध गर्ने,मानव–वन्यजन्तु द्वन्द्व व्यवस्थापन, वन्यजन्तु संरक्षण तथा वन पैदावार चोरी–निकासी नियन्त्रणका लागि सबै सरोकारवाला निकायसँग प्रभावकारी समन्वय सुनिश्चित गर्न
डिभिजन वन कार्यालय तथा खप्तड राष्ट्रीय निकुञ्जका सूचना अधिकारीलाई जिम्मेवार व्यक्तिका रूपमा तोक्ने,बैठक सञ्चालनका लागि आर्थिक सहयोग प्रदान गर्ने र राष्ट्रिय प्रकृति संरक्षण कोष, शुक्लाफाँटा संरक्षण कार्यक्रम प्रति धन्यवाद ज्ञापन गर्ने निर्णय जस्ता निर्णय समेत गरेको वरिष्ठ डिभिजनल वन अधिकृत गोकुलले जानकारी दिनुभयो ।
