डोटी, माघ ०३
सुबास नेपाली
डोटी जिल्लामा भूकम्पपछिको खोज, उद्धार तथा राहत वितरण सम्बन्धी कृत्रिम घटना अभ्यास सम्पन्न गरिएको छ। जिल्ला विपद् व्यवस्थापन समिति डोटीको आयोजना तथा डोटी स्थित नेपाली सेनाको भैरव प्रसाद गण र नेपाल सशस्त्र प्रहरी बल नं. ३६ गणको सहयोगमा उक्त अभ्यास सम्पन्न भएको हो।
पश्चिम नेपाल भूकम्पीय जोखिमको उच्च क्षेत्रभित्र पर्ने भएकाले सम्भावित विपद्का समयमा अपनाउनुपर्ने सावधानी, प्रभावितहरूको खोज तथा उद्धार प्रक्रिया, र राहत वितरण प्रणालीलाई प्रभावकारी बनाउने उद्देश्यले कार्यक्रम आयोजना गरिएको जिल्ला प्रशासन कार्यालय डोटीका प्रमुख जिल्ला अधिकारी कल्पना घिमिरे नेपालले जानकारी दिनुभयो ।
कार्यक्रममा बोल्दै प्रमुख जिल्ला अधिकारी घिमिरे नेपालले पश्चिम नेपाल भूकम्पीय जोखिमको दृष्टिकोणले संवेदनशील क्षेत्रमा रहेको उल्लेख गर्दै भूकम्प गएको खण्डमा के–कस्ता सावधानी अपनाउने, कसरी सुरक्षित रहने र प्रभावितहरूको छिटो तथा व्यवस्थित रूपमा खोज, उद्धार र राहत वितरण कसरी गर्ने भन्ने विषयमा जनचेतना अभिवृद्धि गरिनु आवश्यक रहेको बताउनुभयो।
उहाँले जिल्लामा भूकम्प प्रतिकार्य योजना तयार पार्ने र जिम्मेवारी बाँडफाँड (विभाजन) गरी विभिन्न निकायबीच समन्वयका साथ तयारी गरिरहेको जानकारी दिनुभयो। “विपद् आइपुग्नु अघि नै तयारी गर्नु नै सबैभन्दा प्रभावकारी उपाय हो,” उहाँको भनाइ थियो।
भैरवप्रसाद गणका सेनानी लोक बहादुर बोगटीले डोटी जिल्ला पनि भूकम्पीय जोखिममा रहेको उल्लेख गर्दै आकस्मिक अवस्थामा अपनाउनुपर्ने सुरक्षा उपाय, घाइते तथा पुरिएका व्यक्तिको उद्धार गर्ने तरिका, अस्थायी उपचार, सुरक्षित स्थानमा स्थानान्तरण तथा राहत सामग्री वितरणका विषयमा सेनाले निरन्तर अभ्यास र तालिम सञ्चालन गर्दै आएको जानकारी दिनुभयो। उहाँले सेना, प्रहरी, सशस्त्र प्रहरी र स्थानीय निकायबीचको सहकार्यलाई अझ सुदृढ बनाइने पनि बताउनुभयो।
यसैगरी भैरवप्रसाद गणका सह–सेनानी आशुतोष झाले डोटीस्थित सिलगढी बजार क्षेत्रमा पुराना तथा कमजोर संरचनाका घरहरू धेरै रहेकाले यहाँ भूकम्पीय जोखिम उच्च रहेको बताउनुभयो। जोखिम न्यूनीकरणका लागि समय–समयमा जनचेतनामूलक कार्यक्रम, अभ्यास तथा तालिम सञ्चालन गरिँदै आएको उहाँले जानकारी दिनुभयो।
कृत्रिम घटना अभ्यासका क्रममा भूकम्प गएपछि हुने अवस्थाको प्रतिरूप सिर्जना गरी घाइतेको उद्धार, भग्नावशेष हटाउने, प्राथमिक उपचार गर्ने, अस्थायी शिविर स्थापना गर्ने र राहत सामग्री वितरण गर्ने अभ्यास गरिएको थियो। साथै, भैरवप्रसाद गणद्वारा भूकम्पपछिको खोज, उद्धार तथा राहत कार्यमा प्रयोग हुने विभिन्न उपकरण तथा सामग्रीबारे सहभागीहरूलाई जानकारी गराइएको थियो।
आयोजकका अनुसार यस्ता अभ्यासहरूले सम्भावित विपद्का बेला जनधनको क्षति न्यूनिकरण गर्न, सरोकारवाला निकायबीच समन्वय बढाउन र आम नागरिकलाई सचेत बनाउन महत्वपूर्ण भूमिका खेल्ने अपेक्षा गरिएको छ।
